Oqaluttuassartaa

 

Illutoqqat sisamat nunasiaataanerup nalaaneersut Maniitsup Katersugaasiviatut atorneqalernikuupput. Taakku illutoqqat maannakut aalisakkanik suliffissuup aammalu Pisiffiup nalaani inissisimanikuupput. Tassaallutik niuertup illorsua, ikiortip illua, pequusivik, napparsivik, iffiorfik, nioqqutissaasivik, pisiniarfik aammalu aalisakkeriviit, orsivik kiisalu iginneqqissivik.

Nutaanik aalisakkerinerup tungaatigut atortorissaaruteqalernerup kingunerisaanik illutoqqat allamut nuunneqartariaqarsimapput. Handel-ip illutarisimasai arfinillit ullumikkut eqqissisimatitanngortinneqarsimapput. Marluk suli nikisinneqaratik iniminniipput, tassalu Oqaluffitoqaq toqusullu inaat, sisamallu maanna katersugaasivittut atorneqarlutik iliveqarfitoqqap eqqaani inissisimapput. Illutoqqat nuunneqarnerat piffissami 1970-1978 ingerlanneqarsimavoq.

Katersugaasiviup illutai tassaapput:

Ikiortip illua (B-16) – Eqqumiitsulianik saqqummersitsivik.

Pisiniarfik (B-25) – Tuttunniartarneq nunallu timaata atorneqarnera pillugit saqqummersitsivik.

Napparsivik (B-28) – Toqqorsivittut atorneqartoq.

Sannavik (B-56) – Kalaallisuuunik saqqummersitsivik, Saqqa-kultur, ullullu nutaajunerusut.